Askotan, Akilesera etortzen zaretenean faszia tratauko dizuegula komentatzen dizuegu eta harrituta geratzen zarete, hitz hau entzuten duzuen lehendabiziko aldia delako. Gaur, ehun honen eta beraren tratamentuaren inguruan arituko gara, zuen zalantzak argitzeko asmoz.
Zer da faszia?
Faszia, giharrak, hezurrak, giltzadurak, erraiak, nerbioak, zainak eta oro har, gorputzeko egitura guztiak inguratzen dituen ehun konektiboaren sarea da, gorputzari euskarria, babesa eta forma ematen diena.
Egitura bakoitza konpartimentu ezberdinetan banatzen du eta aldi berean, konpartimentu guzti hauek nolabait elkartzen ditu, etenik gabeko sare moduko bat osatuz. Hau dela eta, egitura zehatz batean kokatzen den gaitz batek, bertatik urrun dagoen beste egitura batean arazoak sor ditzake. Horregatik, egitura honek oreka egokia izan behar du gorputzak behar bezala lan egin dezan.
Zergatik uzkurtzen da faszia?
Ehun honek kolageno kantitate handia dauka eta horregatik uzkurtu eta gogortu daiteke (eta inguratzen duen egitura ere, berarekin bat). Lehen aipaturiko traumatismoek berarengan eragina dutenean mugikortasun galerak ematen dira ehun faszialean, galera hauek, fasziak inguratzen dituen egituren funtzioa aldatu eta mina agertarazten dutelarik.
Miofaszial disfuntzioa.
Barne zein kanpo jatorriko traumatismo mekaniko ala emozionalen ondorioz gertatu ohi da. Kolpe baten ondorioz, ebakuntza baten ostean, hileroko mingarria batek sortua ala postura ezegoki baten ondorioa izan daiteke. Epe labur batean behar bezala tratatzen ez bada, tentsioa eta gihar espasmoak agertuko dira, disfuntzio organiko bat sortuz eta mina emanez.
Miofaszial teknika.
Ehun fasziala tratatzeko erabiltzen ditugun tekniken multzoa da. Hau erabiltzerakoan, fasziak gorputzeko gainontzeko egiturekin duen harremana dela eta, gorputzaren gainontzeko egiturak ere tratatzen ditugu.
Miofaszial teknika hauek aplikatzerakoan, lehen azaldutako mugikortasun galerak desagertaraztea da gure helburu nagusia. Ehun honen gainean konpresio edo luzaketa indarrak erabiliz, bere berezko forma berrezartzeko gai gara. Tratamentua jasotzen duen pertsonak, fisioterapeutaren eskuek presio ahul bat egiten dutela nabarituko du, hau denbora batez luzatuko delarik kolagenoan aldaketak eman ahal izateko.
Ondorioz, zirkulazioa hobetuko da, histamina askatuko da, fibroblastoak modu egokian sortuko dira, nerbio sistemara bideratutako odol zirkulazioa areagotuko da eta sendatzea ahalbidetuko duten hainbat prozesu martxan jarriko dira.
Akiles Fisioterapeutas osatzen dugun taldeko kide gehienek teknika hauek erabiltzen ditugu gure tratamenduetan. Zalantzarik baduzu, galdetu egiguzu eta gustora emango dizkizugu beharrezko azalpenak-